As Nosas Poesías

 Como xa sabedes gústannos moito as poesías. E como remate final deste curso deixámosvos unha mostra das nosas últimas creacións. Aquí podedes ler as palabras... 


Unha Noite En Vela
Cando estou na cama
pola noite,
sen sono,
imaxino lóstregos estralar
e vagalumes alumear.

¡Deus Morfeo,
ven por min,
líbrame destes soños
para durmir por fin!

Oio as doce badaladas 
no convento de Santa Clara.
As horas arrastradas
esperando que chegue a alba.

Un sopor estame entrando.
Ó fin poderei durmir.
Os grilos están cantando,
xa non os vou sentir! 
Aldara Fernández Fernández 5º B

Paxariño

Paxariño,
lévame contigo!                       
Eu quero sobrevoar
un pequeno solpor
e por un arco da vella camiñar.

Quero saber  construír
un pequeno niño de palla,
e alí durmir mirando a Lúa
e espertar mirando o Sol.

Quero percorrer
lagoas e ríos sen mollarme
e pola noite escoitar
o bruar do vento
cantar sen parar.
Sara Mirón Caldas 5º B

As Estrelas 
Eu miro pola ventá e digo:
-Estreliña, ti es moi bonita!
Eu véxote pasar
andando polas nubes.
Sinto que estás comigo
e eu non me rindo.

Outra noite
te verei.                                
Eu sei que sempre estarás alí.
Non me desesperarei.
Eu sempre te verei.

Quero facer unha viaxe
a onde estades vós, as estrelas,
e así poder abrazarte.

Eu sinto que algún día terás que marchar
e entón, un adeus,
direiche eu!
Dalila Eva García García 5º B 

A Chuvia
Hoxe non podo ver
a chuvia que onte caiu.
Rozaba a miña cara
como o vagalume á luz.  

As nubes choran,
o vento sopra
e a luz da Lúa namora
cal doce vento.

O colibrí loita co aire,
a mapoula coa noite
e eu, vou despedirme
loitando coa auga do mar.
Aarón Loira García 5º B

As Nais
As nosas nais son moi boas.
Tódolos días
axúdannos en todo
e sempre están
cando as necesitamos.
Aínda que algunhas veces
 non nos gustan
algunhas cousas
como cando nos berran.
                                                                        
Cando están contentas dannos abrazos
e cando están enfarrucadas castígannos.
Pero sempre nos queren
e iso é o que nos gusta delas.
Son as mellores!!!!
Jorge Iglesias Acuña 5º B

O Refuxio Da Andoriña
Na alborada do sol
vin unha andoriña
buscando o seu refuxio
con moito artiluxio.

Todos os días
sen descanso o encontrou.
Mentres eu, alí, a miraba
ela a súa casa preparaba.

Un compañeiro encontrou
e con entusiasmo
unha bonita familia creou.
Laura García García 5º B

Así É Galicia
Este ano Galicia está moi triste
porque as nubes non choran.

O sol brila máis que sempre,
e o noso satélite, a Lúa,
ten medo de que a mollen.

As estrelas, con medo,
queren saír. Pero non poden.
Por iso están tristes.

Galicia alegrouse
porque por fin choveu
e aínda que non queiramos
gústanos igual
porque sempre
fai un tempo espectacular!
Isabel Recarey Benito 5º B


As Nubes Choran
As nubes choran,
por iso chove.
Están moi tristes                       
porque a Lúa non voa.

Elas chámana:
-¡Lúa, Lúa, ven aquí!
A Lúa non escoita...
Xa non quere saír por aí...
Xa está moi velliña,
a pobriña! 
Helena Pascual Tajes 5º B

A Vida
A vida é o camiño que te guía.
Ti cruzas o camiño
sen pensalo...
Pero ti podes crear
o teu camiño.
Non te cingas á realidade...

A vida é difícil...
Pero a imaxinación axudarache a vivila.
Axúdate
dos demais                       
e axúdate de ti mesmo.
Aínda que as cousas
se poñan difíciles
xuntos, serán diferentes.
Uxía Villanueva Bermúdez 5º B



Galicia
Galicia é o noso corazón
Que nos fai rir e chorar...
E tamén é ledicia e ilusión
que sempre  nos fai soñar.
Uxío Tobío Juan 5º B




E aquí vos deixamos un vídeo coas poesías, lindas imaxes e bonita música. Este vídeo aínda foi traballoso de elaborar. Esperamos que vos guste pois ideámolo con moita ilusión e esforzo... Pensamos que merece a pena... A ver o que pensades vós!!!!!! 

Laura García García, Isabel Recarey e Uxía Villanueva Bermúdez 5º B